Achan morta no seu domicilio a unha persoa en Ribeira

Unha muller faleceu este venres no municipio coruñés de Ribeira, achada inconsciente no seu domicilio da rúa Méndez Núñez polos servizos de emerxencias.

Os bombeiros do parque Comarcal Provincial de Boiro foron alertados ao redor das 20.40 horas do estado de inconsciencia dunha persoa no seu domicilio e da inmediata necesidade de intervención.

Até o lugar acode unha dotación dos bombeiros, onde tamén se atopaba a Policía Local, Policía Nacional e 061. No interior da vivenda atopábanse xa técnicos do 061 e persoal médico da PAC de Ribeira facendo manobras de reanimación por parada cardiorrespiratoria a unha muller na cociña da vivenda familiar.

Os bombeiros mobilízana cunha padiola cara á ambulancia mentres continúan coas manobras de reanimación cardiopulmonar. Tras 30 minutos, o médico declara o falecemento.

Realízanse tamén medicións con detector de gas, que anuncia parámetros normais. Posteriormente, acondiciónase a entrada da vivenda para a chegada do médico forense e persoal funerario.

Completaron o operativo a Policía Local Ribeira, a Policía Nacional, 061 e persoal médico da PAC de Ribeira.