Leiceaga ofrécelle a Villoslada un sitio na súa candidatura para liderar o PSdeG

Os dous candidatos, nunha rolda de prensa.

O portavoz do PSdeG no Parlamento de Galicia e candidato á Secretaría Xeral deste partido, Xoaquín Fernández Leiceaga, cre que a candidatura do seu viceportavoz na Cámara galega e adversario na carreira por liderar o PSOE galego, Juan Díaz Villoslada, quedou "moi tocada".

Nunha entrevista en Cadena Ser, o portavoz parlamentario do PSdeG opinou que Villoslada debería reflexionar sobre a situación na que queda a súa candidatura tras o reconto dos avais e convidouno a abandonar o proceso. No caso de que isto último chegase a ocorrer, non pecha a porta a un pacto co seu viceportavoz no Pazo do Hórreo porque o seu proxecto, remarcou, é de integración e de cambio.

"Eu creo que hai unha mensaxe clara nos avais, unha mensaxe de que hai dúas candidaturas claras de cambio. No meu caso, de cambio con integración. [...] E eu creo que hai unha aposta que claramente quedou moi tocada. Eu pensaría, se fose o terceiro, seguir ou non na carreira", indicou en alusión a Villoslada.

A continuación, asegurou que se presentou ás primarias sen aparato detrás, pero si estando moi presente nas distintas agrupacións, o que se reflicte, precisou, no numero de avalas --case duplica o número mínimo necesario--. Este feito faino sentirse optimista de fronte ao 8 de outubro.

O seu proxecto, continuou, é "transversal, de integración e unidade", onde, asegurou, súmanse sensibilidades próximas ao secretario xeral do PSOE, Pedro Sánchez, así como outras que en procesos anteriores fixeron outro tipo de apostas.

INTEGRAR O ALCALDE DE VIGO

Así mesmo, dixo que respecta a actitude do alcalde de Vigo, Abel Caballero, con respecto ás primarias, aínda que advirte de que o gañador terá que integralo para converter o PSdeG nun partido "gañador".

Sobre as críticas ao seu labor de oposición, Leiceaga recoñece que hai un problema de comunicación, pero nega falta de contundencia: "É curioso porque Gonzalo Caballero di de min que son un bo portavoz parlamentario e Díaz Villoslada participou desde o grupo na definición de toda a oposición que lle fixemos a Feijóo este ano. Pero está ben, debe de formar parte tamén da contenda electoral".

"Eu creo que nos faltan dúas cousas: capacidade de comunicación cos cidadáns e fáltanos que o partido acompañe ao grupo parlamentario no seu traballo. O que faltou neste ano foi o partido", subliñou.

Por último, o portavoz parlamentario do PSdeG apostou por mellorar a relación con En Marea e BNG.