Feijóo di que hai "algunha cousa máis" para que o incendiario dos Blancos estea en prisión

O presidente non dá credibilidade a que "estaba a asar uns chourizos" e critica que asociacións e partidos políticos defendan aos seus "amigos".


|

Descargahelicopteroincendio


Núñez Feijóo deu por feito que o xuíz ten "información" que xustifica a decisión de que o home detido polo incendio dunha hectárea nos Blancos siga no cárcere, baixo prisión provisional.


"Hai cousas que saen por aí dicindo que se o problema era que estaba a asar uns chourizos ou non; dáme a sensación de que iso é unha información incompleta e chamo a atención de que se informe adecuadamente porque non se trata diso, trátase de algunha cousa máis", engadiu, o presidente, a continuación.


Feijóo engadiu que tamén lle "sorprende" que haxa "xente" que estea a favor das medidas preventivas "para algúns incendiarios si e para outros non", en función de "determinadas particularidades da persoa" que presuntamente cometeu o delito.


"NON TEMOS AMIGOS, TEMOS INCENDIARIOS"


"Pero nin eu son xuíz, nin coñezo o sumario, nin me corresponde a min tomar a decisión, só chamar a atención sobre algunhas informacións e posicionamentos políticos. Se hai algún amigo non pode ir ao cárcere e outros si", remarcou.


"Nós non temos amigos, temos incendiarios que cometen delitos de orde pública, e os actos non se poden quedar nunha reprimenda", concluíu.


COÑECER "QUE FALLOU"


O portavoz de En Marea, Luís Villares, pediu ao Partido Popular que permita a posta en marcha dunha comisión parlamentaria de estudo como "lugar idóneo" para que expertos independentes avalíen "que foi o que fallou" durante a vaga de incendios e "establecer unha política alternativa".


Ademais, denunciou que prosegue o abandono da Xunta nas zonas afectadas polo lume durante unha visita na que se reuniu co alcalde de Ponte Caldelas, o socialista Andrés Díaz.


O portavoz de En Marea censurou que no lugar constatou a "notoria insuficiencia" das axudas aprobadas pola Xunta a semana pasada que "non cobren nin de lonxe" todo o traballo que están a desenvolver os municipios "nin se encargan de financiar a restauración e atención integral socio-económica de todo o tecido destruído".


"CASAS E DANOS SEN CUBRIR"


Na mesma liña, a deputada socialista Noela Blanco solicitou este xoves á Xunta un cambio na orde de axudas para os afectados pola vaga de incendios "que se adapte á realidade" e non sexa "unha publicidade enganosa" que "vai deixar moitas casas e danos sen cubrir".


Así o manifestou tras visitar o municipio ourensán de Carballeda de Avia, un dos máis afectados polos incendios forestais dos días 14 e 15 de outubro, onde se reuniu co alcalde Luis Milia e varios dos veciños que iniciaron os trámites para solicitar as axudas tras a perda das súas vivendas ou almacéns.


Blanco confirmou que a orde de axudas xerou "alarma" entre os veciños e o propio alcalde de Carballeda "porque, segundo o texto, moitas casas e danos non se van cubrir".


En concreto referiuse aos almacéns, adegas, maquinaria agrícola e aos hórreos que non están dentro da zona perimetral de residencia dos afectados polos incendios.


Para a socialista este requisito demostra que a Xunta "ten un absoluto descoñecemento do rural galego", porque "o habitual" é que almacéns e adegas non se atopen dentro da propiedade principal.


Tamén criticou que non haxa partidas económicas para cubrir as perdas materiais no interior destas adegas, como maquinaria agrícola ou animais, o que ao seu parecer "revela" que as medidas están destinadas "a empresas agrícolas, non a un rural onde o que prevalece é o autoconsumo".


O 90% DAS SOLICITUDES, SEN AXUDAS


O rexedor lamentou que "segundo a letra pequena" da orde "o 90% das solicitudes quedarán sen ningunha axuda", porque os bens afectados "non están dentro da parcela da casa de residencia".


Ademais, o alcalde considera que salvo as axudas para restaurar a primeira vivenda, o resto será "insuficiente" para arranxar as casas ou recuperar as perdas económicas.


Así, insistiu en que "os 38.000 euros, como máximo" para a segunda vivenda serán insuficientes, "porque se queimaron totalmente" e que "os 3.000 euros, como máximo, para almacéns non cubrirá as perdas do que contiñan".


relacionada A Fiscalía decántase pola prisión provisional para os investigados por incendios
relacionada Oito de cada dez incendios clasifícanse como intencionados sen comprobalo
relacionada A Xunta activa o luns 21 millóns para axudas e indemnizacións dos incendios

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE