A Estratexia de Turismo de Galicia 2024-2030 sitúa a sustentabilidade e a internacionalización como eixos
Xosé Merelles, que cumpre un ano á fronte do organismo tras o adeus de Nava Castro, lidera a estratexia para seguir impulsando este sector que tan bos resultados está a dar á economía galega.
A Estratexia de Turismo de Galicia 2024-2030 buscará fomentar o turismo sostible e respectuoso coas poboacións, patrimonio e paisaxe, así como a internacionalización do visitante.
Así o avanzaron este xoves o director de Turismo de Galicia, Xosé Merelles, e o presidente do Clúster de Turismo de Galicia, Cesáreo Pardal, que xunto á directora xerente de Galicia Calidade, Ana Méndez, inauguraron a primeira das mesas de traballo para elaborar a Estratexia de Turismo de Galicia 2024-2030.
Con estas mesas arrinca a segunda fase da estratexia, cuxo primeiro paso foi a de diagnóstico, con reunións e enquisas nas que, segundo apuntaron, participaron máis de mil profesionais do sector.
"Queremos un turismo sostible, no que haxa unha convivencia coas entidades locais, que o turismo sexa atractivo para o sector empresarial, desde logo á hora de investir, pero tamén que sexa sostible coas poboacións, que os veciños vexan o turismo como unha forma de convivencia. A parte de buscar esa sustentabilidade coa paisaxe, co patrimonio e coa riqueza cultural", sinalou Pardal.
Pola súa banda, Merelles destacou que na planificación na que se traballa tense en conta o Ano Xacobeo do 2027. "Do que se trata é de consolidar o modelo turístico galego que nos levou a alcanzar as maiores cifras de ocupación", incidiu.
Con todo, apuntou que o Camiño de Santiago e o Xacobeo teñen unha "estratexia propia" que finaliza co Ano Santo, en 2027. "Pero temos que ter en conta que, como acontecemento previsible de atractivo, tractor de público e de turistas, hai que telo presente", sinalou.
Así as cousas, para alcanzar a consolidación do modelo, explicou, desenvolverase unha planificación "ordenada" que permita a "consolidación" dese modelo "que tan ben está a resultar para Galicia como creador e de emprego en todos os ámbitos".
Entre os retos expostos para os próximos anos, comentou, está a internacionalización do destino turístico. "Hai que ter en conta que o ano pasado foi o ano no que recibimos máis turistas estranxeiros, ao redor dun 20%. Así que parte desa estratexia dirixirase a atraer a máis turistas estranxeiros, que é onde podemos crecer", indicou.
"ÉXITO ROTUNDO" DE PARTICIPACIÓN NA 1ª FASE
Tanto Merelles como Pardal reivindicaron a participación do sector nas mesas de escoita habilitadas por toda a xeografía galega, cualificando esta primeira fase de "éxito rotundo".
Desta fase, concluíron que o 90% dos enquisados é "favorable" ao desenvolvemento turístico e que un 80% dos empresarios e traballadores que se dedican ao turismo "apoian e están satisfeitos coa evolución turística de Galicia".
Escribe o teu comentario