Volve o 'Maio Solidario' de Gadis en 201 supermercados de Galicia e Castela e León
Este xoves 2 arrinca a campaña solidaria da cadea de supermercados galega en máis de 200 establecementos
A campaña 'Maio Solidario' de Gadis volve este xoves, 2 de maio, e estenderase até o 1 de xuño ao longo de 201 supermercados situados en Galicia e Castela e León. Os clientes interesados poderán achegar ben alimentos non perecedoiros ou ben unha doazón económica no momento de pagar a súa compra.
En total, serán 11 os bancos de alimentos que xestionarán a repartición de produtos doados como a recadación. Participarán os bancos da Coruña, Ferrol, Santiago, Lugo, Ourense, Vigo, Ávila, León, Palencia, Ponferrada, Salamanca, Valladolid e Zamora. O obxectivo será chegar a máis de 800 asociacións e 100.000 destinatarios finais.
Entre os alimentos máis demandados están legumes, leite, arroz, aceite, conservas e cereais. Gadis agradece de antemán "a xenerosidade que sempre mostran os seus clientes" coas campañas solidarias, así como a entrega por parte do equipo humano e os voluntarios.
Cada 'Maio Solidario' de Gadis suma ao redor de 1,5 millóns de quilos de produtos e case 200.000 euros de doazón, segundo datos da empresa.
Escribe o teu comentario