Traballador hospitalizado tras caer desde unha ponte sobre a vía do tren Feve en Mañón
O operario estaba a cortar ramas de árbore sobre a vía do tren de vía estreita que pasa pola Mariña cando por algún motivo esborrallouse. Afortunadamente, as propias ramas amorteceron o golpe. Aínda así, foi trasladado en ambulancia.
Un traballador resultou ferido na madrugada deste mércores na localidade coruñesa de Mañón tras caer desde unha ponte ás vías do tren mentres cortaba unha árbore.
Foi un particular o que alertou ao 112 Galicia, indicando que a persoa non estaba atrapada, pero necesitaba asistencia sanitaria, polo que se deu aviso aos servizos de urxencias do 061.
Ademais, os xestores do Centro Integral de Atención ás Emerxencias puxeron os feitos en coñecemento da Garda Civil e da Agrupación de Voluntarios de Protección Civil de Mañón, así como de Adif, responsable da administración de infraestruturas ferroviarias.
Unha vez no punto, os voluntarios de Protección Civil indicaron que o traballador se danou unha man e deuse un golpe na cabeza. Con todo, a pesar de caer sobre a vía, unhas ramas amorteceran o impacto.
Por todo iso, a persoa foi trasladada en ambulancia até o hospital de referencia.
Escribe o teu comentario