Perigo de inundacións este Xoves Santo en Galicia polo paso da borrasca Nelson

Basta con levantar a vista ao ceo e cerciorarnos de que a Semana Santa vai estar pasada por auga en Galicia . Os pasos na comunidade van ter que ir ben protexidos este Xoves Santo e algunhas procesións terán que suspender pola choiva e o vento que azoutará con forza nalgúns puntos, especialmente no litoral, onde a alerta laranxa leva activa desde o martes e non hai previsión de que descenda o nivel de risco nas próximas horas.

Así, na costa a alerta laranxa por ondas de até cinco metros e ventos de forza 8 esténdese tamén á Mariña lucense, que se suma á Coruña e Pontevedra neste nivel de perigo. Non amainará até ben entrado o venres, cando pase a estar en nivel amarelo. 

A borrasca Nelson, situada nas illas británicas, é a responsable desta inestabilidade que perdurará ao longo de toda a Semana Santa. As próximas horas son as máis complicadas e os servizos de meteorología como Meteogalicia ou a Aemet advirten que os refachos de vento poden roldar os 100 km/h nalgúns puntos e que hai risco de acumulación de choiva en puntos de Pontevedra e Ourense de até 40 litros por metro cadrado. Nestes lugares decretouse a alerta amarela polo risco de inundacións. 

A mellor noticia é para as estacións de esquí e aqueles que querían pasar unha Semana Santa dedicando o tempo libre aos deportes de inverno. A masa de aire frío deixará a cota de neve por baixo dos 800 metros esta madrugada, polo que as nevadas deixarán unha estampa invernal na cabeza de Manzaneda e outros lugares da alta montaña tanto ourensá como lucense. Iso si, como en días anteriores, os termómetros seguirán ofrecendo algarismos impropios desta época, sendo moito máis baixos do que corresponde e chegando a valores negativos. 

FIN DE SEMANA

Xa durante o Venres Santo a situación parece que comezará a mellorar paulatinamente, baixando o ritmo e a intensidade das precipitacións e cun lixeiro aumento das temperaturas. Para Sábado Santo a inestabilidade volverá facer acto de presenza e xa para Domingo de Resurrección os primeiros prognósticos apuntan a que será igual de desapracible que o resto da semana, con choivas en case todo o territorio e algunhas precipitacións mesmo en forma de saraiba ou neve. 

Por iso, e con vistas a que será unha data con moito tráfico por estrada en plena 'Operación Retorno' da DXT, é recomendable a aqueles que teñen que desprazar que sigan con atención as actualizacións meteorolóxicas e programar con previsión as viaxes para evitar imprevistos.