Tirón de orellas a Política Social tras varios avisos para dar praza nunha residencia a unha persoa con TEA

A valedora do Pobo, María Dores Fernández Galiño, reprendeu á Consellería de Política Social por non atender as necesidades dunha familia da área de Vigo para outorgar unha praza a unha persoa con TEA que ten concedido este recurso asistencial, pero que permanecía desde 2022, dous anos despois, á espera dese lugar.

Segundo consta nos distintos antecedentes do caso, que denunciou ante a defensoría galega o pai da persoa co Plan Individual de Atención (PIA) recoñecido, a valedora iniciou as xestións para interesar pola situación de espera da persoa afectada, que comezou cunha recomendación que a Consellería de Política Social recibiu pero non resolveu.

Concretamente, o departamento autonómico informou de que a previsión era incrementar o número de prazas concertadas para dar servizo á demanda existente "o máis axiña posible e na medida en que a dispoñibilidade orzamentaria así o permita". De feito, chegou a publicar no Diario Oficial de Galicia (#DOG) unha orde para concertar 169 prazas do servizo de atención residencial terapéutica para persoas con autismo, que é o servizo que ten recoñecido a persoa reclamante.

Na recomendación da valedora, indícase que a solicitude de atención residencial terapéutica para persoas con TEA era do 23 de maio de 2022 e aprobouse aos poucos días con inclusión na lista de espera --a décimo cuarta (14º) no programa de asignación de recursos asistenciais e a sétima para o centro da súa preferencia).

En decembro de 2023, recolle o expediente, recibiuse na Subdirección Xeral de Coordinación Administrativa da Consellería de Política Social unha recomendación da valedora sobre esta queixa na que se solicita que "se concreten as medidas anunciadas para o concerto das prazas de atención especializada para persoas con TEA" e fágase efectiva a petición da persoa co recurso concedido.

Finalmente, en febreiro deste ano 2024, a valedora do Pobo remitiu un requirimento de aclaración, no que indica que se fai preciso reclamar con "urxencia" que facilite a aclaración sobre a aceptación e, no seu caso, "cumprimento" da recomendación, de atender a reclamación da praza.

NON HOUBO RESOLUCIÓN "POSITIVA"

Como conclusión no expediente, a institución comisionada di que "no momento actual a Consellería de Política Social está a tramitar novos concertos sociais con distintas entidades especializadas" e apunta que "a intención da consellería segue sendo a de promover o incremento do número de prazas concertadas nas distintas áreas para poder dar servizo á demanda existente de atención especializada, na medida en que a dispoñibilidade orzamentaria así o permita".

A Valedora do Pobo apunta que "non se concreta o aumento de prazas de atención específica na área de Vigo", o que "permitiría dar efectividade ao programa aprobado para a atención residencial terapéutica" para persoas con autismo.

Así as cousas, "a recomendación non tivo efectividade", de forma que se incluirá unha mención deste asunto no informe anual dirixido ao Parlamento de Galicia, "ao considerar que era posible unha solución positiva e non se deu", cuestión que se trasladou tamén á consellería.