Benvida a Catalunya a empresa automobilística chinesa Chery

É moi importante para Catalunya, tamén para España, conseguir a confianza das empresas para que invistan en Catalunya tras o goteo continuo da marcha dunhas 8.700 empresas – a data de novembro do 2023- que escorrentadas polo procés decidiron buscar outro lugar en España que lles dese máis seguridade. Esa situación de inseguridade política segue aínda existindo, aínda que tratan de dar a entender que non é así 

En decembro de 2021 a antiga fábrica Nissan situada na Zona Franca de Barcelona ensambló o seu último coche. Unha data moi triste para os 2.500 traballadores que vían con pena como a que fora a súa empresa durante anos baixaba a persiana e deixábaos na rúa. O peche afectaba tamén a 20.000 traballadores de empresas auxiliares. A situación significou un golpe moi importante para os afectados, deixando tamén no aire o 1,3 % do PIB catalán. Non houbo maneira de convencer á empresa nipoa de que seguise fabricando en Zona Franca, e iso que recibira 180 millóns en subvencións públicas,.. 

Desde o mesmo momento que se marcharon os xaponeses, iniciouse a procura dun novo investidor que ocupase ese espazo e devolvese a boa parte dos traballadores despedidos a conseguir un novo emprego nesas instalacións históricas. Non foi fácil e tras moitas negociacións, por fin este venres as antigas instalacións de Nissan volvían brillar para recibir á empresa automobilística chinesa Chery, que devolveu o esplendor a un espazo que significa todo un fito neste sector. 

A firma da súa alianza foi coa empresa española EV Motors coa que levaba meses negociando, e por fin estamparon as súas firmas para converterse na primeira marca chinesa en producir coches en España. Poñerase en funcionamento despois do verán. Todo un fito histórico da reindustrialización dese espazo tan importante da Zona Franca. 

O acontecemento merecíase a presenza do presidente do goberno Pedro Sánchez, o da Generalitat, Pere Aragonés, o vicegobernador da provincia chinesa de Anhui, Shan Xiangqian, o ministro Jordi Hereu, o conseller Roger Torrent, o delegado especial da Zona Franca, Pere Navarro, e outras autoridades que asistiron á firma do documento marco por parte de Pedro Calef, conselleiro delegado de Ebro e do vicepresidente internacional de Chery, Charlie Zhang. 

Un acto no que se pon de manifesto que cando se queren poñer de acordo os políticos e as administracións ás que se representan, as cousas funcionan, que é o que lles pide a cidadanía. Un exemplo que debe ser o inicio dunha normalidade que non é froito da campaña electoral, senón do compromiso por solucionar os problemas que afectan as persoas. Un bo día, que non se viu enturbado pola demanda electoralista de ERC, Junts, CUP e Comuns, que pediron no Parlament a retirada das imputacións por terrorismo vinculadas ao caso 'Tsunami Democràtic', e condenaron a "persecución política" dos movementos populares independentistas. Unha petición que non se axusta á realidade, porque boa parte das accións do 'Tsunami Democràtic' de pacíficas non tiñan nin o nome. Por favor hai que ser rigorosos e non panfletarios, á xente que o viviu en vivo e en directo - ou o padeceu- non se lle pode vender milongas. A xente debe asumir as consecuencias dos seus actos. Hoxe non tocaba sacar o tema, cando se produciu unha boa noticia en Catalunya que non ten nada que ver co procés. Non espantemos aos investidores, que logo se lle botará a culpa ao goberno, os xuíces ou ao que pasaba por aí.